انا من تكون وكتى تكون !!!

2

Written on 8:59 PM by asmaa



نامى ياحلوة نامى وادبحلك جوزين حمامى....

كنت اريد ان ابقى مستيقظة ...ارى تلك الالوان والحركات والصور المهتزة الجميلة ...

كنت احب ان يحملنى احدهم كى ارى الصورة اوضح من على كتفه ...كى انطلق فى تكوين ذاتى...

وبعدين انا بحب الحمام وبحب اشوفه طاير هناك ...ليه هتدبحوه بس ...

انت زى ال.......نام بقه ربنا ي.....

طب ليه بقه الغلط..!!!

كل ما هنالك انى ارغب ببعض الحنان ...اريد ان العب قليلا...فهل من احد يدغدغنى ويلعب باطراف اصابعى ...ويمسح ع وجهى فاشعر ببعض البرودة هناك...

بتعيط ليه خنقتنى بقه..ما تنطق مالك!!....

طب بتجيبوا عيال ليه طالما خلقوكوا ضيق!!!!!!

انا بس تعبان حاسس ببعض التقلصات فى المعدة طب انطق ازاى فهمونى!!!

هتاكل ولا اجيبلك الاشكيف المخيف ...

انا خايف قوى ...بس مش قادر آكل !! يارب ارحمنى ...انا واقع فى مشكلة ولو ماكلتش هيجيبولى اللى ما يتسمى ده !!

بطل لعب بقه التليفزيون هيبوظ....

انا نفسى اعرف حتة الزرار المفعوص ده بيجيب الناس دى ازاى جوا الشباك ده !!!

اترزى اقعد هناك ع الكنبة ...

انا مش عايز اقعد هناك ...ليه التحكمات دى ..ليه اعمل شئ غصب عنى ...

اكره ان اقول ذلك لنفسى ..ولكنى ارغب فى الحديث معها الآن , انى احبها فعلا ...ولن اتردد لحظة فى ان افديها بنفسى ...اتذركين انى كنت اخزن جانبا من المصروف كى آتى اليك ببعض العسلية التى تشتهينها ...لانى احب ان ارى البسمة تملا وجهك ...واشعر بالرضا عندما تضحكين وتاكلينها بنهم !!!

اذكر اننى كنت ابكى لاجلك ...عندما يقلقك شئ او يحزنك شئ ما !!

(انتى زعلانة ليه انتى كمان ...انا ناقصة بس ...)

حلمت دوما ان ابنى لكى قصرا كى تشعرى بالمذيد من الراحة والاستقرار ..

(انتى مش هتنفعى ..ايه الفشل ده ..)

حاولت ان اقدم المساعدة ولكن ...

(اكيد مش انتى طبعا اللى عملتى ده...انت عمرك ما بتساعدى..)

لا ادرى لما اشعر بالميل من ناحية ذلك الفتى...مع انى اكره ذلك ...

ترمق اليها بنظرة ثاقبة وحاجبين مقضوبين ...ولا تتفوه بكلمة

احب الكلية الفنون الجميلة وارغب بالاتحاق بها ...

والله لو ما دخلتى طب وجبتى مجموعها لهتشوفى ومافيش كليات هتقعدى جنبى فى البيت انتى عايزة تكسفينى قداام عنايات اللى بتنده لبنتها يادكتورة !!!

عايزة اروح سينا نفسى اشوفها حرام ابقى فى مصر وما ازورهاش

ولما ترجعيلى ميته هعمل انا ايه!!!!!

الاعمار بيدى الله....استودعينى عن ربنا وما تقلقيش وبعدين مش بتقوليلى لا اله الا الله وانا ماشية ..ماتقلقيش

هيا كلمة ومش هتنيها ...

عايزة العب كاراتيه ..

امشى ياقليلة الادب

كبرت شوية ...واشعر ببعض الثقل فىجسمى ووزنى ذاد بعض الشئ ..ممكن العب سباحه ..

طبعا روحى العبى عايزة يبقى منظر جسمك وحش!!

طب ما كان من الاول !!!!!

اوعى تقولى ده ...اوعى تعملى ده...كده غلط....لالالالا..توء توء توء...عييييييييب...مش قلت عييييييب...المقشة اهى ورا الدولاب....شفتى بنت عمتك اعملى زيها ...!!!!!!!!!!!!!

انا مش طالبة غير طلب بسيط قوى وده مش معناه انى مش بحبكم...

انا عايزة اكون انا !!!!!!!!!

بس!!!!



وكانت ليلة البارحة...

7

Written on 4:12 AM by asmaa

كنت انوى كالعادة انى امارس هوايتى المفضلة فى الكتابة والقاء ما فى جعبتى هنا على المدونة , كمن يحمل غربالا ويضع فىه كل ما بداخله من هموم والم وحب وفرحة وحزن ثم ييغربله هنا كى يترك فقط الذكريات الجميلة ...لا ادرى لماذا دائما اشارك مدونتى الاحزان ولا اعيرها اهتماما عندما افرح ...هكذا الحياة تشاركنا آلامها وتتركنا عندما تسعد كى ننظر لها من بعيد وكانما نرغب بحقنا فى المشاركة .. فياتى الرد باهتا من وراء ابتسامة خجولة ... اذهبوا انتم كى تبحثوا عن السعادة فى مكان آخر ...جاء ملاكى كى ينقذكم من حفنة مشاعر غاضبة كانت ستصب ع المدونة ..وبالفعل اتى فى لوقت المناسب ...كانت الليلة الماضية حيث تسربت اخبار ما عن خطة بين امى وخطيبى (ملاكى ) ولا ادرى ماذا يدبران لى حتى دقت التاسعة وعلمت انهم يحضران لى مفاجأة ما ..جاء ملاكى كى يحتفل بعيد ميلادى (بينى وبينكم يعنى 23 سنة) يااااااااه بجد كانت مفاجاة كبييرة قوووى انى احس انه فيه انسان رقيق حاسس بيا وعايز يعملى حاجة تفرحنى وتسعدنى ...بجد كنت ببص فى عينه وانا بتخيل انى بضع قلبى بين كفيه (اقل واجب يعنى) بجد كنت هتبسط قوى لو قلبى كان طار وبصيتله لقيته فى كفه وبالرغم من ان انه هيتفاجا من موقف قلبى حاسه انه هيبصله بحنية ويطبطب عليه ويسيبه يطيرليا تانى بقه :D...بجد بجد مش عارفة اقولك ايه او اشكرك ازاى ...بس كل اللى اتمناه انه ربنا بجد يقدرنى واقدر اسعدك فى ايامنا اللى جاية مع بعض خصوصا بعد زواجنا باذن الله ياأجمل ملاك لا املك غير ان اقول لك بجد انت فعلا ملاكى ....

نزلوا الستار بقه.....

اه صحيح الهدية بقه كانت فعلا حاجة كنت محتجاها بجد بعد ما الله يرحمه الدى فى دى رايتر بتاعى الله يرحمه

وبعد الام بى ثرى بتاعى اللى كنت بستعمله مخزن الله يقوية بقه

وكانت الهدية

WS Portable hard disk 160 GB

واخيرا.....لاداعى للقلق من زحمة الجهاز

ولا داعى للقلق من نقل البيانات .........

تسلملى بجد يا....ملاكى